Israel ram khawsakna awlrui (the history Israelites) dawngah Samuel he awlpui tangkik tawngha pakhat la awm tih; Israel cathli kah Awlcekkung (Judge) hukhyng kok la khaw awm. Samuel tah Israel cathli kah lamha cyk sengpahrang Saul situi toih pe kung la awm. David khaw Samuel lawng situi atoih pe. Saul lawng Pathen awl a eek congah Pathen lawng David a tyk.
BAWIPA lawng Samuel na la, Kai lawng Saul te Israel sawah sengpahrang la awm tlaih nawh ham ka hoot pon dawngah, Saul sawah mezoh to na kou ai? Na kut dawngah aka awm ramsa kii dawngah situi thlon langtah na cehna hamkoi lawngpui ah cet lah, Bethlehem khaw ah aka awm Jesse tengah kan tuih ai. Ahih kah capa khat te sengpahrang la ka tyk pon, a tina (1 Sam 16:1). Te dawngah Samuel lawng situi a khyhna – kii te a lawh congah a miamanauthli haaiah situi on a syyp; te hin kawlang BWIPA kah muithla te David sawah tharaana on pahoi awm. Te congah Samuel te Ramah khaw la kop voi (1 Sam 16:13).
Khawthee ngaaihang on Ramah ah awm sut veng Pathen lawng Samuel a thlop – David situi toih pe ham a tuih pe. David tah Israel cathli kah sengpahrang thai la awm pon ai. Tede Samuel kah kawtheena tah dip pahoi nawh – Samuel lawng Saul a thintlawhna tangkik.
David situi atoih pe congah Samuel tah Ramah khaw la kop mel tih awm, a dyk to Saul sengpahrang tengla khaw leng tlaih nawh angla David kah bibi kung la khaw awm pe tlaih nawh. Pathen lawng Samuel aceh tak pon dawngah nawh. Israel cathli lawng Pathen awlpui kok la akhyh u tlaih nawh tih taksa hoihkhangna ham Pathen aming u (zoutheenna pekung lak ah zoutheenna te lat ah a thintlawhna u). Amah teang thaihu thee dawngah Pathen thlaang Samuel tah thum ham akaw bot sut pon tih Ramah la mel on Saul ham kou de, a dyk to Saul mikhai huh nawh ham a zawm – a dyk to. “Te congah Samuel te Ramah la cet tede Saul tah a im a awmna Saul kah Gibeah la cet. Samuel lawng Saul dawngah kou de, ahih huh hamla cet kop tlaih nawh. BAWIPA khaw Saul te Israelthli sawah sengpahrang la a khyh dawngah a thinkaw patang palai la awm” (1 Sam 15:34-35).
“Heah kapai he. Athee ka sai atah BAWIPA on situi a syyp haaiah thui u lah. U kah vaitawtal ka lawh pe? U kah laamarang ka lawh pe? U ka thailatna? U ka hephap? Mik ka ziinna hamla u tengkah bawthlawkna thaihu ka lawh? Heang thaihu khat khat ka sai atah, adongla ka sai ai, a tina. Tethli lawng “U khaw na thailatna nawh tih na hephap nawh. U kut kah n’tu thaihu khaw na lawh pe monih a tina u. Samuel lawng tetheli tengah “BAWIPA tah nangmi aka ming puikung la awm tih, situi a syyp thlaang khaw, ka kut dawngah nangmi lawng tu na hu u nawh, tite tihin ah aka ming puikung la awm” a atina. Tethli lawng “Oih, ahih tah sausii ni” ti u (1 Samuel 12:3-5).
Samuel tah Saul on Israel ham kou ruila Ramah ah dyk. Awlcekkung kalawng dym, ralkapthli khyh tlaih nawh, thlaanghai ah pai haihna ham a pazathli, a hubaang thli khaw awm tlaih nawh. Tede, Samuel kah Ramah ah patangna lawng Khrih awltak dyk tola paaipui kungthli, Pathen mikhai daan on aka song thaihu paipuikung thli kah ongna te a sop sak. Samuel tah Pathen thlaang, dongna, thymna on bi aka bi thlaang la awm. Politics, ngawlcoon huurna, miphyn congna taksa benkah aana (power and authority) piit pawmna on Pathen bi aka bikung thlang nawh. Thlaangdong tah Ramah ah rap. A patang palaina Khrih thlaangbol ham hingsopna la awm!
Eternal Agora 