Luke 10 dawngah Samari thlangtheen pakhat kawng Yeshua lawng ning cangpui. Samari thlangtheen kawng n’yak u boeih poen. Samari aka ti hue he a u thli kai?
Samari thli he Judah phun thli van ni. Tede Assyria ram oen Judah ral tho coengah Assyria lawng ta tih Judah ram ana uk vai. Tevengah Assyrian miphun thli oen zuva u the (intermarriage) tih thlangmi pungtai hang. Judah nu thli oen Assyrian tawngpa thli; Assyrian nu thli oen Judah phun tawngpa thli yuva u the dawng kalawng – Samari miphun sawk la awm. Batupuei (Matupi) khaw he Kawl thli (Bamar) lawng ana uk tih Khrih phung la aka awm mueh Kawl thlangthli oen Matu thli yuva u the ti oen lo u.
Tetila, Kawl thlang miphun tloe oen aka pit-pawm u cathli te tah Matu thli lawng khaw hoet u vetih Kawl thli lawng khaw do u tak thai manawh. Miphun tloe pahih laklaw ah aka vaivawn sut thlang la ni a awm khoeng ai – tih nawh aw? Kawl de Kawl tak heet nawh. Matu de Matu tak heet nawh. Buddha la khaw awm tih Khrih thlangboel la khaw awm noe noe. Awl parawna kungah, thlanghai awlthuina ah, luhmuzii oen naingazii bibina ah – nang miphun tak nawh awm duem, caal boel! a ti u ai. Kawl thli lawng do u heet nawh angla Matu thli lawng khaw do u heet manawh – amah hetah thuinuetna awl mai nih.
Tetihvanangla, Samari thlangthli he Judah miphun oen Assyrian miphun thli laklaw ah aka vaivawn sut, thlang lawng atu la sak nawh miphun thli la awm. “Kah-pya” (mixed) miphun la awm. Judah thli lawng Pathen tah caalla aming u ka noek. Tede Samari thlang oen Gentel thli tah a thee na u. Ka oen Pathen ati u de, hingna lawng taksa hingna avoeih u tloel – Yeshua dung kah Judah thli te. Judah thli lawng tetila khawsakna te Yeshua lawng ahuh vengah a thin tlo tangkik. Khaw map ati. Baibul awltak ming oen tangka hu ah aka bat thli, Pathen bibikung ming oen mikhai theenna mailai aka tlap thli (Pharisee oen Sadducees) thli la awm u.
Chin community timah Chin-Samari thlang thli baroe nawh la awm. Chin-Rakhine, Chin-Kachin, Chin-Karen, Chin-Bamar, Chin-American (Chin thli lawng thlangbawk nu/thlangbawk pa yu/va u the dawng kalawng cuun la aka awm canau thli) ti la. Tetihvanangla, Matu community timah Matu-Samari thlang thli moen awm van. Hakha, Falam, Tedim (aluen ben), Arakan, Khumi (akak ben) yu-vana u dawng kalawng cun la aka awm Matu thli. Ngala-ben oen Dom ben, Cing ben oen Daai ben aka pit-pawm u thli – tila te moen awm. Amah tethli tah “Matu-Samari” thlangthli la awm u.
Samari thlangtheen kawng he camawca veng kalawng yak la awm poen de – athuingaihna tak aka yakming heet thlang moen awm nawh. Miphun aka pit thli theena (hatred), Matu-Kekvang, Daai Kekvang, Kawl-kekvang, Falam-kekvang, Hakha-kekvang, Kachin-Rakine-kekvang oen Doem ben, Cing ben, Ngala ben kekvang la aka awm thlangthli te thlangsoep nawh la aka thui thli, hemtekna oen aka voem thli tah church kah ahamca thli, phung lawk lawk aka thui thli, pastor thli, Pathen bibikung thli nih. Yeshua lawng amah teang hingna a ngaih nawh. Pathen lawng do nawh. Pathen lawng a thii na – God hates it. Na imben lungna lah, ati. Miphun tloe thli na nautat atah thlang lawng nang nautat van ai. Chin thli lawng Chin-Kah-pya thli nautat atah American thli lawng Chin thli nautat van ai. Matu thli lawng Voitu thli oen Daai thli, Miphun tloe oen cuun la aka awm Matu thlangthli nautat van atah – American society (USA) ah thlang lawng tethli te patoeng nautat van ai. Na imbe te na lungna poen aw? Pum im ah saya la aka awm Levi thli oen thlanghai ah necktie theen oen saya paihuen ah aka awm thli, pastor thli (tlangbawi) lak ah Samari thlangtheen te Yeshua lawng alungna ngai. Bawi thli kah thawngsang tangka lak ah hawhai nu kah tangka-pya-khat-hih te Pathen lawng aphu awmsak ngai. Nainganzii oen luhmuzii aka sai thli lawng mah phuen-mah thlang calla alungna u. Tethli lak ah let ya (x100) la Khrih ming oen thlang lungna ham, miphun tloe thli lungna thai ham – na kut dawngkah Baibul, pum im kah Pathen lawng ning cangpui nawh aw? Ming boeih boeih lak ah ming theenkoek “Yeshua” lawng ning cangpui nawh aw? Lawkih phung kah lungna tlo ngaai. Pa-ca u the dawng kalawng valaw lungna tah cak ngaai. Khrih hingna n’khueh u nawh dawngah…
Nangtah Matu-thlangtheen la va awm lah!!
Eternal Agora 