Mary oen Martha lawng a nganpa Lazaru a lungna tangkik. Yeshua kah a paya kheet la khaw awm u. Baibul dawngah Yeshua oen lenghaih paya kheet kawng yahaw tueng nawh. Mary lawng Pathen awl tui oen buh angla a hal poepa. Martha lawng bibina te awlpuikoek la a thui. Yeshua lawng oengna oen bibina he khat la a cangpui. Mary alungna van angla Martha khaw alungna. Pathen awltak he hingpui thil a ngoe.
Jerusalem khawpui tengkah Bethany khaw, Yeshua lawng a lungna tangkik Mary oen Martha kah a nganpa, Lazaru tah Abraham rang dawngah duem poen. Duekna darkhing awl, khaw khui kah thlangboeih lawng a yak u poen.
He bak ah Lazaru kawng Baibul dawngah tueng nawh. Yeshua lawng hing sak koep coengah a mela cet kai – a u lawng ming nawh. Duek tih tho koep coengah Lazaru tah Cyprus khaw ah pastor abi tila khatsut cil awl dawngah tueng. Khatsut lawng, duek vai poen dawngah Lazaru lawng laihing roe roe he a ngak sut poen, ti – soeng voek mai thai.
Ana pa oen nu ben kah cakawthli rawksawt la law u cawi ni. Paya-laikoei oen athintlawh thli lawng ngawlh pui u cawi nih. Kamyin kamlai pah thuk pah hang thlangthli ham oen Lazaru kah thlanmawl kawng dawngah Martha tah bawi sut cawi nih. Raina tawnglii veng, duek hing caan ah Yeshua mela cet, rawksawt la khaw tu dawngah law nawh kai – Mary lawng ati mai thai.
Tevengah Yeshua tah Jordan tuiva ral khawlaw ben ah awm. Bethany khaw oen Jordan tuiva (Baptisma pekung Johan lawng tuinuemna pekna huen) tah zoei ca tih thla nawh. Bethany oen Jerusalem khawpui tah meng 20 tluk thla tih khaw oen nikhat tluk cet ai. Bethany khaw ah rawksawt thlangthli cingbaat tih rawkvui coeng dengah Yeshua pho pe la awm.
Cakaw kheet (nu oen pa, maya manau) duekna tawngvai poen thlang boeih lawngtah aming u. Rawk kungah ngawl veng – kawtheena aih te. Lungbui hoep sut tih ngaihang khawbingna lawng phep sut lii veng ngaiuep hingna roe roe awm thai nawh. Lungbui tlo oen ko tih kawtheena lawng nam rap thuk. Khawtheena, ngaihangna, yuutna (guilt) oen thintoek thinsana pitpawm tih n’ko u – aw duekna kah a sy tah thawng tangkik.
Mary oen Martha rap. Yeshua khaw rap. Khawtheena huhang ram ah awmlii veng – Yeshua lawng, “Kai tah hingna oen thawkoepna la ka awm. Kai aka tangna thlangtah duek cakhaw hing koep ai” (Johan 11:25).
Tihin ah, Yeshua lawng ning doet lii, “Na tangna aw?” Yeshua tah “hingna” oen “thawkoepna” la awm. Thlawk oen yakming bir lamha ngoe nawh. Yeshua te na bawipa oen thlawnkung la tangna lah. Mami boeih tah “duek” boeih ai. Khrih hingna dang nawh thli boeih tah dungyaan hell huen la cet u poen ai.
Eternal Agora 