Khrih thlangboel paicuekna awlrui (church history) bueh vengah: Bawi Yisu vaan la a luihangna khaw hin sawm-nga (50) buelh a tlingna Pentecost hin te nih Khrih thlangboel a thangna (birthday) la awm; Judea peng Jerusalem khawpui ah a Ciim Muithla hailai angla tla khuengdengna khawhin la awm tih amah tetah AD kum 33 ah paka cawini — tila Baibul cathoem yahawh ngai lawng ati. Te kalawng diklai pengtawm ah Thlawnna Awlthang Theen tah ana pungtai hangla awm. Khrih ming phoeih oen ngawn ham thlang lawng ana teng u caan la awm. Khrih ming phoeih dawngah duekna thlan-mawl aka khum thli khaw sava nawh awm. Amikmuu thli a koeih pe u. Kut-khaw boet a tloek pe u. Mevuen (ramsa vuen/phaw) oen haih phak angla yawl tih thlawh oen pahih pathum la a ah pe u. A rawn poet a tloek pe u. Hai dawngah, tuibe dawngah sungpung sak u tih a ngawn pe u. Thing (thinglam taai) dawngah a taai pe u tih yarau yadeng oen patang palai la a duek sak pe u — tede Khrihca tak thli lawng Yisu a tamthoeih pe u nawh. Tetila patang khangna vawng thli te Khrih ming oen a tlim sak u tih Khrih thlangboel roengna tah kum 2025 thlai law poen. Tede, khatsut van bal lawngtah Khrih phung oen Pathen Awltak te cehtak u law law — Lot kah a yu angla, kawlkalh loeih demna oen he diklai ben kah hoeih-khangna sui-nguun tangka a tuila tle te a thintlawhna u dawngah Khrih hingna te lungkeh tung la ana coengsak u.
Bibi kung te thui u boel de sih. Khrih hubang tak canau, yu-va, nu-pa la ng’awmna he thlanghing ben kah tharaana mai oen coeng thai nawh — yoei nawh. Thuina-maiah, U.S bran lawng, “Mortgage (imlai phu) thlakhat ah $5000 na bank dawngah thla roek deposit ka van sai ai, na kaw tla atah ming na peek thai — tede, Khrih Yisu tah ka thlawnkung oen Pathen nih tite ca la van tel langtah sen rap thut thil a herh ai” ti mai khawi nih — Baibul Awltak he na hingna oen na lungna tak thai hun ai aw? Imlai phu bran kah benefit thlakhat ah $5000 te kawlkalh ah poek mai lah. Nayi tem khat ah $20 na bi phu te na mah ham poen nih: tui-hai bills peek ngoe tlaih nawh. Im laiba thlaroek sah ngai tlaih nawh. Australia, England, Germany, Norway, Canada, Asia ram, Africa ram, South America ram oen Europe ram pum boeih khawk khawk na hil thai poen vetih coengkoeng la na ngawlh heet poepa vetih na siksui kheng poen ai — ya oe, awmtheenna bawtui aih te. He angthli lak ah let ya (100x) la aka theen ngai thli yaan Khrihca thlangboel thli lawng aceh tak u — Khrih oen Pathen Awltak te lai awmtheenna lak ah a ngaih u bet dawngah. Tethli kah patangkhangna rangoen tahe mami lawng Khrih ming he a yoei cala yalpaw cala ng’phoeih u thai. Mami mai kawi nih Yisu mikhai dan tang manawh — dan kheng tang manawh.
“Rome wasn’t built in a day (Rom ne fut pas faite toute en un jour)” ti. Mah awl latah: “Rom khawpui tah hin at bueng oen sak la awm nawh” ti. Khrih hingna tah a yoe peek de, Khrih ah yalpaw hingna (Freedom of Christian Lifestyle) tah yoe nawh. Kum thawnghih coengah a pai sawng tih thaih aka thaih oen lo u – yoei nawh; mailai nawh. Thaihu theen tak dang na thai ham tah a caan rau, thinsaan a ngoe tih pumpeek hingna khaw a ngoe. Khrih ah awmngaih poepa u hawn sih. Khrih thlangboel khawdeng-raina tue oen caan tah valaw koep ai. Lampawk yamdiik a phuui cala na khueh poen aw? Duep oen hai cu suide aw?
“Ongna dawngah he angthli boih he a zaawk u, tede u lawngkhaw awlkhyhna te pang nawh. Mami on thik at la ahimi khaw a sopna u thai hamla Pathen lawng aka theen ngaai thaihu te mami hamla avan rok avan bah” (Heb 11:39-40).
Eternal Agora 