Yisu Khrih tah Awltak. Awltak tah Pathen. Yisu tah Ciim Muithla. Ciim Muithla tah Pathen. Pathen tah khat nih. Baibul tah Pathen Awltak (cauk oen caram te thui-ngaihna nawh). Yisu te lai; zoei koep tlaih boel ati ngaihna. Pathen cuihna te lai, tlap, khoek ati ngaihna. Thaihu khat khat lai vengah tangka oen ng’lai u. Tangka tlap he zoei nawh. Tangka tlap veng raina phuen soeprep ng’tawng u. Thlaantui khawyung pui (big toe) toe baw dengah buh baap thai. Tangka tlap zoei nawh. Thaihu lai ti roe roe he zoei nawh.
Awltak te lai. Atu thuingaihna? Awltak kha tihe atu? Baibul rel veng, pastor thli kah phungthui awl, Awltak he ng’yak u poepa. Khrih kawng he ng’yak u poepa. Thlawnna awlthang theen he ng’yak u poepa. Awltak khawkhana va pai ai, ti. Pastor oen Pathen bibikung thli voet sut ai, Awltak paangpuikung thli haa yip ai ati ngaihna nawh. Awltak khawkhana tah Pathen Awltak atu la sak nawhna; Pathen rihna thinkaw oen khawsak tlaih nawhna; Pathen ming a phoeih khak de Awltak buem aka ngaih nawh thli tare tare yahawh hang ai tite nih a thuingaihna. Tede nangtah Awltak te lai lah, ti. Patang khangna oen Pathen awlngaaina oen hing lah; baainak khaw-awk angla lawmh baai poepa lah; lumuek angla muek khak lah; taisawm angla yen poepa lah; khawmuek angla naat poepa lah; yu-ca angla Pathen Awltak te thintlawhna lah; taksa nu oen pa, miphuen oen cakaw pahring lak ah Pathen Awltak te No. 1 ah khueh lah; duekna lawngpui tah kau —thlang yahawh lawng bung vai mai cakhaw nangtah hingna lawngpui aka ceek te vai lah; dungvoengna oen khaw sa lah; thlangyu thlangca thawlhpui boel, nai boel; huen boel; atloe Pathen bek boel; thaihu thee sai boel; thlanguett boel; Pathen hai ah awlngaaina oen hing lah — ati ngaihna nih. Amah tetah Awltak lai a mingna. Yoei aw te — yoei nawh ng’aw? Tede Yisu lawng bawm ai.
Awltak te yoei boel. Atu thuingaihna? Mikhai theen dangna mailai ham Pathen ming phoeih boel; na imkhui kaw, na miphuen, na khawram roengna rumro ham Pathen bibi boel; khawdengca im tah na kaantak de aka bawi thlang hoeihkhang im atah tu-le-tu thangthui ham na cet poepa – tetila khaw saboel; ka mase nih, ka cava nih, ka maya nih, ka patai nih, ka cakaw nih ti oen tanghuur khak pe boel; Awltak lawng “theen nawh” ati atah “theen nawh” na ti hamla awm; “theen-oeih” ati atah “theen-oeih” nati hamla awm; thlang mikhai daanna oen mah hoeih khangna hamla Awltak te phoeih boel; Gospel cet la saa tih tangka tlap thli (businessman) lawng thaihu noe noe yoei angla Pathen ming phoeih boel; Pathen ming phoeih atah phoeih law law; Pathen ming phoeih noe noe – taksa poekna oen hing noe noe tetila khaw sa u boel; oengna oen na tawng atah oengna oen boet sak u; oengna oen tawngtih tiisa poekna oen boet sak boel — ati ngaihna nih. Thaihu tehca (little things) mai khaw na sai veng Baibul lawng metila ahuh tila tlek na doet ham awm. Tetila khawsak thai dengah abo thlang (great things) Pathen zotheenna tare na dang ai, ti.
A tawiboet la thui sih. Muithla awl oen betoetna tah Awltak lai oen lo u. Awltak te yoei boel tihe thlawnte cathli ham bueng thui la awm. Khrih hingna na khueh coengah Pathen kawngaih na ming lalal ah Pathen paipui muehla tiisa ngaihna thlanghing ruem kah poekna angla khawsakna thli te “awltak yoei” a mingna. Awltak aka khueh mueh thlang lawng awltak yoei thai nawh. Tiisa thlang dawngah hingthaina (born-again/Khrih) awm nawh. A khui ah awltak awm nawh. Pathen aka rih nawh thlang tiisa thlang te tiisa ngaihna dawngah tlim ngoe nawh, tliim tangte la awm dawngah. A hawngpa lawng “ka ca duek poen” ati thai nawh – aca awm roe monih. Haisuep khui ah aka awm nawh mingboei muem khangparang aka tlap oen lo u. Lawkih thlang nih. Pathen thlang nawh. Tedawngah, “Awltak te yoei boel” tikah awl he — thlawnte cathli ham nih. Awltak te lai. Khrih hingna na khueh poen aw? Na khueh tak poen aw? Na khueh tak tak poen atah — Khrih kah khawleh te tluep tluep cawt tih na saya hu ah bang van loeih. A tloe khawleh vai tlaih boel. Awltak te yoei koep tlaih boel. Awltak na dang thlan roe atah — tihin roe roe ah awltak te lai loeih!
“Awltak te lai lang, zoi kop tlaih bol; cuihna, botheenna on zakmingna te dang lah” (Tahtuk 23:23)
Eternal Agora 