Reformed thlangboel kah oengna tah AD kumpacuut 16th vengkah Protestant Reformation dawng kalawng a tawng. Khrih thlangboel tah AD 33 yunyan ah pai cuek la awm. Tede kum 400 thlai a deuh hang coengatah Yisu Khrih amah oen Celtuih thli kah cangpuina khatsut thli te Khrih thlangboel lawng tawmthilna, hoetna thli ana awm hang. AD 400 – 1500 yunyan kah Khrih thlangboel cangpuina thli he Baibul oen aka kalh thli moen awm tih thlanghing lawng tawmthilna thli awmna dawng kalawng thlangboel tlaihpaanna (Reformation) ava thoeng hang la awm. Thlanghing lawng tawmthilna yahawh ngai voeih u bangtlang tih Pathen Awltak cabu ciim dawngkah cangpuina bueng oen Khrih thlangboel mawtna thli voe voeh tha ana raa hang. Ahula tah Germany ram Roman Catholic thlangboel kah cangpuikung Martin Luther lawng tevengkah Khrih thlangboel te a oelh – tlaihvawngna tlaihpaanna a pai pui tih Thlangboel tlaihpaanna te mawt. Catholic thlangboel bueng a oelh nawh Baibul kah cangpuina oen aka kalh sungrai kah cangpuina oen thlaang ngairung ngairaa la a cangpui Khrih thlangboel boeih te khaw a oelh.
Reformed kah cangpuina lawng thlanghing kah poekna (human-centered) awlpuikoek la a khueh nawh; Pathen kah poekna (God-centered) he awlpuikoek la ana khueh u. Tedawngah Pathen kah ukna Aana (Sovereignty of God) he Reformed thlangboel lawng awlpuikoek la a yakming. Khrih Awltak (truth), Thlangboel (church), Thlawnna(salvation), thlangboel tuinuemna (Baptism) oen sacrament kawng cangpuina thli boeih he Cabu Ciim kah cangpuina angla Pathen kah Ukna Aana (The Sovereignty of God) a dangah ni awm tila a yakming u. Reformed thlangboel lawng hetila yakmingna he Pathen pumim ham doek nawh tih Khrih thlangboel khat rip oen Khrih hingna a pum boeih (the whole Christian living) hamla khaw soep tila Cabu Ciim lawng cangpuina angla a yakming u. Thuinamaiah, pum veng kah ham bueng nawh tangka tlapna (economics), cuihcangna (University and education), luhmuzii (social and cultural) oen ram uktemna (politics) boeih ah Baibul kah cangpuina ning angla hing angoe, mawt angoe tila cabu ciim kah cangpuina angla a yakming u. (Baibul aka thoem American Reformed Theologian Dr. RC Sproul cathut dawngkah).
Eternal Agora 