Pum la aka cet thlang a phun phun awm. Khat oen khat kah oengna vai u the nawh. Ngaihna khaw lo u the nawh. Poekna khaw lang. Amah he lawng thlangboel tim ah peek bona thli awm poepa ai tite — a tyng sak.
Khatsut lawng kutbel oen sawipet ruila, lamruila Pathen koeh angaih. Khatsut lawng dym ngawl tih, lungbui dawngah Pathen awltak thypthyp poekna oen, lumlaa theen laa-rawi oen Pathen koeh a ngaih. Pathen koeh dan khaw khat oen khat kah ngaihna vai u the nawh. Mawtna kawngah huta lawng pastor bi seh, tawngpa thli byng lawng pastor bi seh a ti u the. Tetih van angla, khatsut lawng Pathen kah khyna oen hoepna kawng, Pathen bibina kawng aciim la ming dawngah Pathen bi abi u angla khatsut lawngtah mingla ming roe nawh – bi saloel a ngaih u parap.
Pumim aka cet boeih lawng kaw-at oen cet u nawh. Pumim cet he theen tila nu oen pa lawng cangpui dawngah aka cet thli awm angla, paza laikoei aka tlap ngaih thli khaw thum van bal. Khatsut lawng ahamca thli oen voem ham angaih u dawngah, bawi thli oen voem a ngaih u dawngah, hula thlangtheen thli awm dawngah, tangka oen buh-aan tui tui awm dawngah nawh atah a tloe hoeih khangna khat khat tlap a angaih u dawngah pum im cet thli moek awm. Khatsut byng lawng Khrih thlangboel kawng hingna lawng a noek, Pathen koeh bawk hamla, awltak hutung a ngaih u taak dawngah pum la cet u. Ahih lak ah Pathen ka ming ngai ti thaina ham pum la aka cet thli khaw awm van bal hun.
Khrih thlangboel taak byng lawng Khrih tah a thlangboel kah a lu tila a noek u. Alu koek Khrih lawng thlangboel mawtna laawng, metila Khrih thlangboel mawt tyng tite thut sut tangte la awm poen — Baibul dawngah. Tede, thlanghing kah mingna oen poekna lawng zakmingna a phun phun a awm sak. Tedawngah, Catholic, Protestant thli (Baptist, Pentecostals, presbyterians) tila a phun phun ana awm hang. Cangpuina, miphyn, awl oen poekna aka vai u thli khat la pum u. Bu a thloek la pai u. Diklai sing poen nih.
Thlangboel (church) dawngah ngaihna, poekna, mawtna a lawngim, zakmingna a phun phun awm tih pekbo u the mai cakhaw Khrih thlangboel taak (church of Christ) dawngatah langna awm nawh. Hetila pekbona awm dawngah Pathen mingna a phu awm nawh ng’ti u poen sih aw? Nawh. Thlanghing mikhu thlangboel tah rawkna oen pawcina ben la cet poe mai cakhaw Khrih Yeshua lawng a thlangboel ceh tak nawh – Khrih thlangboel tah awm poe ai — haa zip tlaih manawh.
Eternal Agora 