Thlanghing thik-at khaw sahaihna kawng (society) on tuhkai tih cakaw u thena (family) kawng Baibul lawng metila a thui — dan u lah sih. Cakaw la awmna he khaw sahaihna kah imtungpui la awm. Imtung cak nawh atah camaw thli kah lymhangna mailai lawng pateng im te tlim sak rup thai. Imtungpui cak atah thlipui va law cakhaw tlim tlaih manawh. Cakaw khat ah nu on pa awm, canau thli awm. Khat rip boih lawng a paihyn on bibina a khyh u. Ca lawng ca kah paihyn on bibina a khyh; nu on pa lawng paihyn on bibina a khyh. Lungna on bibina lawng cakaw khawsakna awmtheen sak tih canau thli lawng taksa (body) on pokna (mind) ben ah sadingna adang u — amah tetah cakaw pa khat nih. Amah heang cakaw lawng thlang hing khaw (society) kah imtung caksak rap la awm — amah tetah thlanghing thikat la khaw sahaihna (society) pakhat nih.
Thikat la khaw sahaihna tivengah aka thum thaihu mon awm: mah kah singzo moibo on cakaw khat angla talawng takai u the tih hing khawsakna thli te thum. Canau lawng raina atawng vengah nu on pa, cakaw thli boih lawng a kaw the u — pum khat thikat la khaw sahaih dawngah nih. Tihnawh kawinih na tat manawh — na pum van nawh dawngah; ahih on pum khat thikat la khaw na sa haih van nawh dawngah. Namah on tuhkaina awm nawh tila na pok dawngah; na cakaw u kheet nawh dawngah; paca nawh atah na tai u the nawh dawngah.
Tedawngah cakaw kah mingnokna tihe awlpui la ana awm hang. Khatsut lawng pa nih awlpuikok a ti u. Tih nawh nu khaw awlpuikok van, khatsut lawng a ti. Pa awlpuikok aka ti hy lawng imkhui kaw khat ham pa kah congna te nokna (identity) la a lawh u. Thuinamaiah, Laidik napa he Sawngsing phun la awm atah Lunghaw nu zu na mai cakhaw Laidik kah phun tah Sawngsing phun la nih awm mai — nu ben kah nokna Lunghaw te a voih pe. Khatsut lawng nu thli khaw awlpuikoek van ta, tedawngah kekvang awm seh a ti u. Nu party thli kah pokna lawng Laidik he Sawngsing-Lunghaw (nawh atah) Lunghaw-Sawngsing phun la awm seh a ti ai. Pa party thli lawng tah tih nawh, Laidik he Sawngsing phun la ni awm ai — ana pa Sawngsing kah nokna on khawsak ham awm a ti u ai.
Hetila pokna lawng cakaw/imkhui kaw khat on khat laklaw ah awlpungna on hemtekna ana awm hang. A congna nokna (identity) aceh tak tih kan lungna tila nu thli lawng ati u pateng. Hetila nu thli kah aka dung tangkik lungna he pa thli lawng sah lek thai nawh lungna on nu thli lungna seh tihe thlanghing cuihna lawng caksak heet nawh — Baibul byng lawng tetih ben la a thui. Thlanghing cuihna lawngtah, “nang huta nih, dym awm” tikah pokna ngai ngai pon nih. Mah phung on singzo lawng khaw amah tetila nih a ti. Khrih phung dawngah tah amah teang awm thai nawh. Baibul lawng pa thli he vaan to thangpawm tih nu thli tah lai ah thla nawh — a vaan pir la a thui. Bibina dawng atah langna awm tite a cangpui.
Cakaw khat nokna khat (miphun congna) on thikat la khaw sahaihna tah awlpui tangkik. Thlanghing khaw (society) ham imtungpui la awm. Taksa (body) on pokna (mind) ham sadingna la awm. Hing khawsakna awmtheen sak tih lai hing didip sak.
Tede, Zesu lawng, “U khaw kai lakah ana pa aw ama nu aw aka lungna bet thlaang tah kai kah thlaang la koih nawh; u khaw a capa aw a canu aw kai lakah aka lungna thlaang tah kai kah thlaang la koih nawh” — Matthai 10:37
Aw… tlou tangkik lungna bou. Khrih lungna tah bou bet. Nang Khrih thinglam na kawh ngamh tang aw?
Eternal Agora 