Matu cakaw lawng Matu singzo ng’khyh u. Khrih awlthang theen avan pha thlan ah Matu singzo he Matu thli ham Baibul tluk phu aka awm thaihu nih. Matu phung singzo on aka kalh koi la khaw aka sa thlangtah tamdengna aka zawk thlang la awm. Tethli tah: Nu-ngaak myh miphun tlo zuna thli, mah miphun on cakaw nawn zu-va parap thli, ngan-nu imkah awk ngan aka cathli, ngan-nu ham vaa ngan aka thak vai nawh thlangthli, ngan-pa ham (pu-pi mingna) takawi yh/cun on ai (ai-ngan) aka thak vai nawh thlangthli, mase-cava ngan-nu ngan-pa pu-pi vom tawina laawng aka ming nawh thli on Matu singzo ceh dan tula aka sak nawh thli. Mah lak ah aka ham te ahamca paihyn ah awmsak aka ngaih nawh thli, pataai u thena on pa-ca u thena tula aka sak nawh thlang boih tah tamdengla awm seh — amah tetah Matu phung singzo kah awltak la awm; Matu phung singzo kah Gospel la awm.
Matu phung singzo tetah a phoih khak ka nok de amah nawn tetah Matu phung singzo angla khaw aka sa nawh Matu nu on Matu pa tah thlangthai palat nih — te thli te a u lawng thlangla a sak ai? Thlangraawng nih ng’ti u boih ai. Matu phung on singzo aka lungna tak lawngtah nga ngah yhna on phungza singzo te a vai – lawkih phung on po aka hing thlang la awm. Matu phung on singzo he ka thlah pak atah Matu thlang ka mingna tlaih manawh ti tih a hingna boih on Matu phung singzo te a pai pui popa ai.
Zisu lawng mami ham phung thai on singzo thai avan khyn. Khrih phungtah Baibul kah cangpuina nih. Baibul lawng, “Pathen kah lungna” lawng mami te thlangdong la ava cong sak pon, ti. Tedawngah, Zisu Khrih te a taktangla aka ong thli boih tah, Ca Ciim lawng a thui angla, “thlang dong” la ng’awm u pon — Pathen kah areenna rang on nih, ti. Areenna (grace) tah Pathen amah kah lungna (love) dawng kalawng va law. Pathen kah lungna lawng mami dong sak pon. “Mami” ti he a u thli kai? Lawkih thlangthli thum nawh. Khrih dawngah aka bol u boih thlangthli te nih a thui ngaihna.
Matu phung on singzo tula a sak nawh pa lawng, kai khaw Matu thlang van ni — aka ti thli mon awm. Tetihvan angla, kai khaw Khrihca thlangbol khui ah ka thum van, ka thangthai pon aka ti thli mon awm. Khrih phung Baibul kah cangpuina angla khaw aka sa nawh Khrihca mailai te Zisu lawng nok nawh. Ka thawlhna boih amah lawng van sah – thinglam taai dawngah. Tedawngah ka thawlh laiba he $1000.00 mai kawinih Zisu lawng $1000.00 bit a sah pon. Tedawngah, ka thawlh bak bak mai cakhaw Pathen hai atah thlangdong la ka awm tong tong aka ti thli te Pathen lawng nok nawh. Pathen kah lungna he vang aka ting tangkiik thaihu nih. Pathen kah lungna tah Zisu Khrih amah pon nih. Pathen kah lungna he $500,000.00 lak ah aphu awm ngai. Millions-thawngsang billions lak ah khaw aphu awm ngai. Pathen kah lungna he atu on khaw lai thai koi la awm nawh. Lai on vaan ah phu aka tingkok aca pa khyh dyyn Zisu Khrih rangon mami te thlangdong la ava cong sak pon. Hetitluk la vang aka ting Pathen kah lungna te mami ham azo la peek pon.
Tihtlukla phung aka tingkok thaihu (Zisu Khrih) ah mami Pathen lawng lungna. Amah he kawng he saya Paul lawng aciim cala a nok (Filip 3:8). A miphun (Judah) lak ah Khrih te aphu a awm sak ngai. Ahingna lak ah khaw Khrih te aphu a awm sak ngai. Aphu awm ngai te nih mami lawng khaw ng’ngaih u, tih nawh aw? Dollar caku $20 aw na tyk ai, $100 aw. $100 te ni ng’tyk u boih ai ng’aw? Khrih ca tak ham Khrih tah soprep boih lak ah aphu awm ngai. Dollar $20 lak ah Dollar $100 he aphu awm ngai tila ka on thui khing lak ah — ruh dak lang atah tangka te kel loih. Khrih lungna tah aphu awm ngai ng’ti u khing tih Khrih te awlpuikok hyn ah ng’khyh u tlaih nawh hingna tah “thlangthai palat” “thlangraawng” kah hingna nih.
Matu phung singzo metila na lungna tih na thin tlawhna? Khrih phung awltak te tah metila na zak ming? Khrih awltak tang na zak thai pon aw? Khrih hingna tak (hingna tak) na khyh pon aw? Matu phung on singzo lungna tangkiik de Kawl hol la aw lat na awm? Ka thangthai pon n’ti de catah Khrih awltak awlpuikok la na khyh nawh atah — Pathen hai ah nangtah “thlang auh” la na awm tong tong. Ahamca aw, member aw, pastor la aw na awm? Khrih awltak awlpuikok la na khyh nawh atah — thangkop hingna na khyh thlan hun. Zisu Khrih he Pathen amah ham pateng phu aka tingkok thaihu (khyh dyyn capa) la awm de nang ham tah Khrih he baai-pawn angla aw a awm? Diklai thaihu boih lak ah nang kan tyk na ti thai pon aw? Zisu Khrih lak ah phu aka ting thaihu awm hyn kawi nih amah teni Pathen lawng mami ham pek sui de. Vang aka tingkok Zisu Khrih ah Pathen lawng mami lunga — zoza la. “Mami” tihe Khrih thlangbol tak te nih a thuingaihna.
Eternal Agora 