Moibo tihe atu nym? Moibo theen on moibo thee awm. Athee khaw atheen khaw moibo he lungbui dawng kalawng ni atawng. Lungbui thinkaw thee atah moibo khaw thee van ai. Tetih van angla, thinkaw theen atah moibo khaw theen van ai.
Moibo kawng he Khrih phung myh lawkih phung lawng pateng awlpuikok la ana khyh u van. Buddha on Hindu bawkna lawng khaw moibo theen kawng he awlpuikok la a cangpui. Thinkaw-huilai-bibina sopbir ango tila ana cangpui. Tedengah vaan (Nirvana) pha ai, ti. Thuingaihna tah moibo theen ham nga-ngah na zawm atah vaan na phai ai, ti (he kawng he thlangboih lawng ming tangte thaihu la awm).
Baibul lawng: moibo theen thaina ham Khrih tharaana ango lamha, ti. Khrih kah dongna khyh lamha ango, ti. Tedengah, Khrih moibo on voh voh na rong hang vetih Khrih Moibo on betot hingna na dang ai. Moibo theen ngo nawh, Khrih hingna byng awlpui – tila Baibul lawng cangpui nawh.
Khrih hingna (thlawnna) tah zopek thaihu de, Khrih hingna moibo tah thahyyrna a ngo (bi sa lol ango). Tihin thangthai tih vyn ah moibo parap theen thai nawh – a zaila voh voh moibo theen hang ai. Khrih hingna (thlawnna) dawngah “lungna” pahoi thum thil la awm pon. Tede, mah lawng Khrih lungna on hing sa lol nawh atah — Khrih hingna tha raa thai nawh. Khrih hingna lungna tah tungling boukok la awm. He kah lungna lawng Khrih moibo karh sak thai la awm. Zesu kah hingna dan u lah sih:
Zesu lawng hetila phung a thui: thlang lawng na bantang ben beng te bel atah khat ben beng te dyyn peh, ti. Thlaang lawng tamthoih tih ngan bawh zawk sak veng, Zesu lawng kut thung pe nawh; dyyn sut pe lat (Matt 26:67-68). Zesu lawng hetila phung a thui: nang aka thii na thlang ham thaihu theen sai peh, ti. Rom ralkap thli, Zesu awl atu la sak pe nawh thli, Zesu aka thii na thli kah tlawhna thli Zesu lawng a hoih pe sak (Matt 8:5-17). Athee te athee on van thung u bol, athee te a theen on van ta sak u lah, tila phung athui. Zesu tuuk hamla ava law khawsoih bawi kok kah tuihzoih pakhat kah a haa te Piter lawng samsen on pot atlok pe. Tlok pai seh, zawkna seh — ati nawh. Khawsoih bawi thli lawng Zesu athiina u tangkik. Ahimi lawng kai thiina dawng ka thiina van — ati nawh. Tede Zesu lawng ahaa te kop ahoih pe sak. Athee te atheen on athung pe.
Aw…Bawipa, na bi bi ham zoi tede awltak kah cangpuina ang hingpui thil ham rai tangkik. Houtu, saya on pastor bi ham zoi ca, tede — thlang cangpui angla mah nawn lawng hingthilna ham rai tangkik. Thlangthee thli lungna ham thui bol, te thli kah bawva pateng ka thii na. Ka raal thli metila ka lungna thai ai? Kai aka thii na thli metila ka lungna thai kop ai? Na moibo ka khyh nawh atah a u lawng ka phungthui awl a hutung u ai. Aka hutung thlaang awm nawh atah a u lawng awlthangtheen a paangpui ai. Khrih moibo on myh la (Satan kah moibo on) na bi ka bi hau nawh ham kaimi he khang lah. Amen.
Eternal Agora 