Pathen hai ah soprep boih tah tyng kor la awm. Lai thlanghing lawngtah boih ming thai nawh. Pathen hai atah Khrihca tak on tak nawh tyng kor la awm. Thlanghing lawngtah Tuinymna dangtih Bawipa Thlembuh aka vel thlangtah Khrihca tak cawi nih ng’ti u parap.
Khrih thlangbol (local church) ah Khrih hingna akhyh tak on khyh nawh thlang pitpawm tih awm (Matt 13:29-30). Thlanghing mik huh atah tuun im aka law thli he Khrih ah thlangdong hong la awm de Pathen mik huh atah lang; Khrih ko tak thli byng Pathen lawng anok. Tedawngah thlanghing lawng Pathen nok lak ah Pathen lawng ning nok he awlpui bet. Mah lawng Pathen phoih khak lak ah Pathen lawng ning phoih khak te awlpui bet.
Khatsut lawng bal tah amah kah thaihu saithaina te awlpui la apok. Thlawnna kawngah kai lawng ka ong lamha tih ni thlawn la ka awm ati u. Vaan on hell tyk thaina nawl (free will) kai dawngah awm ati u. Ka ong nawh atah hell hyn la cet ai. Ka ong atah vaan ram ka pha ai ti kah aka song nawh mingna lawng ahingna athing pe khop. Ong on ong nawh kamah nawl ati u, he kah nawl he Pathen lawng pateng thawsak thai la awm nawh ti hil ah aka tangna thlangthli awm pon. Tedawngah, thlawnna awltak zak veng ka tangna ti on ka thangthai pon ti u parap tih tuinymna pahoi adang u. Tuuni m la cet tih Khrih hingna moibo congthai khui a zawm u sa law. Thlawnna tah saina thum nawh Pathen kah zo pek thaihu ni tite ka hawng on tah ati u de, ahingna lawng dou u nawh. Ahing khui ah awltak awm nawh dawngah khawhin adeuh vengatah Pathen te aceh tak u. Pathen awltak te dou u nawh. Pum im ceh on Baibul rel; Khrih lungna on patang khangthli boih ahoot bangtlang. Tedawngah, tethli lawng thlawnna he auh thai, ti. Baibul cangpuina atu la sak u nawh. Pathen lawng hawna lak ah ahimi lawng Pathen te lat ahaw na u.
Amah he angthli boih he thlanghing lawng Pathen nokna nih. Tethli te Pathen lawng nok nawh. Khrih hingna tethli khui ah awm nawh. Khrih awltak tethli khui ah vot.
Pathen tah soprep mingkung (omniscient) Pathen ni; soprep ukkung aana aka hamkok (sovereign) Pathen la awm. Soprep boih thlan ah Pathen awm tih he kah Pathen lawng lai on vaan (universe) he syn la awm. Thawlhna he lai ah kuun thlan veng kalawng Khrih ah thlawnna amah Pathen ah kamthlah opsoh pon dawngah a u lawng khaw Pathen he olh thai nawh. Khatsut lawng Khrih Zisu a hoot u vetih khatsut lawng dou u ai ti khaw aming opsoh la awm pon. Pathen amah kaw aka cu (a hoop) thli byng te a khy. A khy thli te a dong sak (thawlh khawdawp angaai pe). Thawlh khawdawp ngaai pe thli (justified) byng te ni Pathen lawng thangpawm (glorification) la awm ai (Rom 8). Khrih ah thangpawmna tihe vaan ram phana te thuingaihna.
Baibul lawng ongna byng on thlawn la awm ati nawh. Pathen kah thaarana thum, ti. Pathen thaarana tah Areenna (Grace) he ni. Pathen kah Areenna tah athaa ra metitiah Pathen tah lungna la awm. Pathen kah lungna awm nawh hyyn ah Pathen kah areenna awm thai nawh. Pathen kah lungna tah dung tangkik mah aw. Pathen kah areenna tah thaa ra tangkik mah aw. Pathen rangon ongna ka dang. Ongna rang on thlawn la ka awm pon pai he. Pathen kah lungna, areenna on a thaarana rangon nih. Aw Pathen lawng kai hoop opsoh pon pai he – a khyna awlthang kai lawng ka zak. Ongna on ka dou on pahoi ka dong pon pai he. Pathen lawng lungna dawngah ni. Pathen lawng reen dawngah ni.
Eternal Agora 