Khawsoih bawithli (chief priests), cangsakna awl thutkungthli (scribes) on Judah thlang ahamcathli (elders) lawng baptisma tuinymna pekung Johan he Pathen thlang (tawngha) ni tite atangna u nawh. Tede Jesu lawngtah Johan he Pathen thlang ni tite aming. Aming byng khok myh la Johan kah tuinymna te adyyn pe. Adyyn pe byng khok myh la, tare asop sak la awm. Vaan la alui thlan ah ahubangthli (Apostles) na la Pathen (Pa, Capa on Ciim Muithla) mingon tuinymna pek ham acang pui. Yeshua lawng, “Johan kah baptisma he vaan ben kah aw, nawh atah, thlanghing ben kah aw? van thui u lah, ati na. Vaan ben kah n’ti na kawinih atu dawngah Johan kah baptistma te na olh u ati veh. Thlanghing ben kah ni ng’ti na u bal kawinih thlangping kah ‘vote’ dang manawh tite kok arih u. Thlangping zahaw thlang lawng Johan he Pathen thlang tite anok. Pathen thlang nawh thlanghing mailai ni ti mai kawinih thlangping kah upatna on paipuina athlawng u ai tite aming u no no dawngah, Jesu kah awldot te “Ka ming nawh” tila aleh pe u.
Awltak Messiah Yeshua (Jesu Khrih) te aming u nawh, dou u nawh, ahoot u. Tede community ah ahamca, bawi on saya (khawsoih bawi, ahamca, awlthutkung) la ngon tah awm angaih u ka nok (Mk 11:27—33).
Jesu lawng tethli te bibikung (servant) paihyn ah ni akhyh pe. Amami tim atah ahamca-bawi-saya ati u de Jesu lawng pawm pe nawh. Jesu amah te misur dum khyh-kung paihyn ah awm tite mingsak ham angaih dawngah nih. Khyh dyyn capa Messiah Yeshua pateng khaw ngawn ham ateng u pon. Pathen thinsa myh la awm ai aw? Dum khyh-kung Pathen lawng a dum te thlangtlo pe myh la awm ai aw? Awm manawh — Misur dum te thlangtlo ham pek la awm pon (Mk 12:1-12). Gentel thli ham zoutheenna la awm.
Mah kah paihyyn (calling) aciim la ming he vaan zoutheenna la awm. Pathen rih on community mawt he awlpui tangkiik. Jerusalem kah khawsoih bawithli, ahamcathli on cangsakna awl thutkungthli lawng Johan on Jesu tah ahoot tih community ah mawtkung la tah awm angaih u angla; mami khaw Baibul kah cangpuina on Pathen awltak he thingthaih angla haam khyk tih hin heet thlan ah houtu-saya-pastor parap parap saithli he theen nawh. Community lawng vaan zoutheenna a thlawng ai. Pathen kah zoutheenna lawng kaan tak ai. Pathen rihna on Khrih awltak dawngah malhaam bibikung thli la va awm pe lah. Member thli kah thinkaw lungbui dawngah “Pathen awltak” zahawh awm atah “tangka on awltak” zoutheenna pungtai ai. Tede te hyn ah sui-nguun on miphyn-tangka-mingtheenna thli on na be sak atah — Khrih Jesu kah raal la ni na awm pe khong. Mami tah dum khyh-kung nawh; bibi-kung (saal) thli mai nih. He dilai on tah lang tangkik mah aw.
Eternal Agora 