Eternal Agora

Thangkopna dawngah zakmingna khat on khat vai u the nawh. Khrih thlangbol khawsak hingna kawng (church history) byh veng, zakmingna aka vai u thli khat la cuut u tih community pakhat la rap pai thaina ham tihe zaan Khrih ongca khat rip kah bibina la awm. Cangpuina aka doong te tah paipui ham ango ti kah pokna te khat rip kah pokna dawngah awm. Cangpuina on zakmingna vai u the nawh de khaw sa u haih sih, ati u nawh. Cakaw de thlangphyyn khat de Khrih kawngah cangpuina pawm dan (doctrine) vai u tlaih nawh atah tethli on thikat la Pathen koh-bawk u tlaih nawh. Hetila Khrih awltak hingna ben ah thaa a raa u dawngah Europe ram a hinhyyn sak u tih Khrih thlangbol tlaih paanna diklai peng tawm boih ah karh sak u la awm. Tih nawh kawinih Khrih thlangbol kah aka thym cangpuina (doctrine & teaching) thli tahe mami lawng ming thai tlaih manawh.

Thlangbol tlaih paanna (reformation) ty ah thaa aka raa kok cangpuina pakhat tah Jacobus Arminius kah cangpuina he nih. Ahula tah ahih kah cangpuina on zakmingna te zaan thlangbol tim ah Arminianism tila ana awm hang.  

Thangkopna kawngah Arminian thli lawng he tila a pok u. Khrih lawng thinglamtaai dawngah a dykna rangon thlang boih hamla thlawnna lawngpui a rok a bah pe. Thangkop hingna (born-again) dang thaina ham thlanghing kah thahyyrna a ngo; moibo theen a ngo; thlawnna khui ah kuun thai na ham thangthai lamha a ngo tila a cangpui. Arminian thli kah pokna lawng thangkopna he Pathen kah sai byng nawh; thlanghing amah byng kah saina bal khaw nawh; thangkopna (thlawnna) tah thlanghing kah ngaih tykna (free will) on Pathen reenna awltak haih bawng u tih aka awm thaihu nih, ti. Lamha cyk ah thlanghing kah bibina a ngo; thlanghing lawng amah kaw-ngaih ning angla Pathen a tyk cong dengah, Pathen reenna lawng thangthaina (born-again) a peek, tila a cangpui. Thuinamaiah, pastor-saya lawng phung thui veng, aka hutung thlang mami lawng mah kah ngaih tykna (personal choice or free will) on Pathen ng’ong u thai atah, Pathen reenna (grace) ng’dang u vetih, tekah Pathen reenna lawng ongna rangon mami tah thlawn la ng’awm u nih, tila a cangpui. Tedawngah thangthaina, thangkopna he thlaang lawng a nepla a kym khak nawh atah, dal raa atah, Pathen awl on pawlneng u popa tlaih nawh atah auh kop thai, tila a pok u.

Methodist, Wesleyan on khatsut Baptist, Pentecostal la aka awm thli lawng Arminian kah pokna te thym tila a pawm u. Thlangbol khui ah peekbouna on awlpungna, saya saina on kawvai u nawhna thli he amah hetila pok thawlhna on vai u the nawhna dawng kalawng “direct” la ngon law nawh de; zahawh ngaai tah hetila vai u the nawhna pokna dawng kalawng raina ava thong hang la awm. Tedawngah thlangbol kawvaina he awlpui tangkiik. Doctrine on cangpuina he awlpui — pok mailai, sai mailai ham nawh.

Thlawn la awmna tah thaihu sai dawngah nawh. Mah kah ngaih-tykna (free will) on Pathen ong thai parap nawh. Thlawn la awmna tah Pathen peek kutdou nih. Pathen reenna (grace) lawng mami kah thinkaw lungbui dawngah bi ana bi lamha tih thangthai sak lamha. Tecong dengah Pathen tengkah “ongna” ng’dang u. He kah ongna rangon thlawn la ng’awm u pon. Mah lawng keek vang, Pathen lawng keek vang bi abi tila awm nawh. Za ah za (100%) Pathen kah bibi na nih; Pathen kah zopeek thaihu nih; thlanghing kah saina thum ro ro nawh — teca khaw thum nawh. Tedawngah ook aka ngaih lawngtah Khrih ah ook u hawn seh, ti. Ning lawng Pathen phoih nawh; tih Pathen amah lawng nih ning a phoih rap dawngah thlawnna tak he auh thai nawh. Dungzaan to la cak; dungzaan ham pon nih. Amen.