Eternal Agora

Kawl thlaangthli on tengawm miphun tlo thli thikat la cingcuui u tih Rampui (Union of Burma) pai sih tikah pokna zilh dawngah awm thlan vengah Adoniram Judson lawng Khrih kah lungvatna kawng Kawlram ah phawng la awm pon. Chin miphyn thli ramsa tlung ang ramhym ah khawsak lii veng Carson zuva (Arthur & Laura Carson) lawng Khrih kah lungvatna avan khyn pon. Matu thli sungrai bek tih zukungah lamlii vengah Rev. That Dun lawng Khrih lungvatna avan khyn pon (khatsut Matu thli lawng, Rev. That Dun Maturam a pha thlan ah, Khrih awlthang theen azak u tih tuinymna khaw adang u pon). Tede, Paham Rev. That Dun tah Maturam ham Pathen lawng sai thlom bibikung la awm.

Rev. Judson he Baptist de phyn thlok Baptist la awm. Kawlram ceh tawmca hil Particular Baptist la po awm. Tevengah Rev. Judson he phung thui mai kawinih tahe kah Reformed Baptist pastor thli (nawh atah) Reformed pastor thli angla athui ai. Tahe atah Kawlram Baptist he liberal ngai la cet u pon.

Khrihca thlangbol tare tare pungtaai hangtih cangpui thawlhna thli khaw tare tare pungtaai u van. Khrih Awlthang theen tak kalawng phel tih thlaanghing kah lai taksa ben ngongaihna awlpui la khyh tih Pathen bi aka bi thli (health and wealth prosperity Gospel) kh’voh kh’voh pungtaai hang pon. Khrih Awlthang theen tak pangpuikung Baibul cathom thli lawng: taksa sadingna, bawina on Pathen zoutheenna kawng byng pangpuikung adang kah saya thli lawng thlangbol mawtkung sava nawh lawngpui ahang sak tila athut: Kenneth Hagin, David Yonggi Cho, Kenneth and Gloria Copeland, Creflo Dollar, Benny Hinn, Benson Idahosa, Joyce Meyer on Joel Osteen. He thli kah cangpuina thli he Baibul kah cangpuina thli on kalh la awm dawngah America ram atah Khrih thlangbol sava nawh lawng paipui u nawh. Canada kah aka awm saya David Lah khaw tethli hu ah nih baat van pon tila khatsut lawng ati. Pentecostal thli lawng muithla bibina he, awlpuila, tangka bawina on sadingna hamla apangpui u — Pathen bawilenna ham nawh, thlanghing bawilenna ham mai nih, ti.

Pathen he atu? Pathen he a u? Baibul Awltak tah atu nym? Ciim Muithla on a bibina tah atu nym? Thlanghing he atu? Thlanghing he a u? Jesu Khrih tah a u? Thlangbol tihe atu kai? Diklai caan bot ty ham Dungzaan Pathen lawng metila khaw ana khaansut pon kai? He ang kawng thli Pathen tuun im ah zak popa ham awm de, mami lawng za thai tlaih nawh pon. Mami tengah tihin Jesu awm mai kawinih pastor thli, saya thli on ahamca thli ruibong on vai u boih suide. Pathen awltak zakna tyng ah “Tangka, miphun, social ben kah thaihu, politics on atlo tlo” thli nih lat ah ng’zak u pon. Pathen Tuun im he thlangbol kah lungbui; ongcathli kah lungbui he Pathen Tuun im. Pathen Tuun im ah Pathen awlka phawngna awm nawh atah, araal pa satan kah thaihu saina on bibina awm ai. Tetila awm atah Khrih thlangbol rawk ai. Tedawngah family on community lawng Pathen thinsana zawk u lii la awm. Awltak im la mel u kop pon sih.