Eternal Agora

Pathen mingna on miphyn congna kawng he atip cala zakming kawinih community khawsak hingna ham hoihkhangna mon awm. Pathen mingna he akawnglam mingna (knowledge) on Pathen kawngaih angla hingna (formation of faith) tila pahih la pek bou tih zakming thai la awm. Pathen amah on akawngaihna kawng zahawh mingna tah akawnglam mingna (theology) la awm tih Pathen on akawngaihna kawng ming tih hing khawsakna tah Khrih hingna (Christian living) la awm. Pathen amah kawng mok ming de a hingna ah Pathen myh la khaw aka sa thlang awm thai. Khrih hingna ka khyh pon ti on khawbo theen oot tih Khrih hingna dawngah ni ka awm pon ti nono de awltak Pathen kawnglam ming myh la khaw aka sa thlang awm thai van bal hun. Hetila zakmingna tah Pathen kawng mingna on Khrih hingna dawng kalawng ava law.

Dilai Khrih thlangbol (visible local church) im theen te Pathen kawnglam mingna, Khrih hingna khyh byng on sak thil la awm nawh. Vaan Khrih thlangbol tah Pathen Awltak mingna hingna byng on sak thil la awm. Tedawngah vaan Khrih thlangbol tah sop; lai Khrih thlangbol tah sop nawh. He kah aka sop nawh lai Khrih thlangbol (visible local church) hetah thlanghing kah moibo on singzo (social and cultural fabric) on khaw sak thil la awm.

Aka sop thaihu pou pou tah vaan ben kah la awm tih aka sop nawh thaihu pou pou tah uica on thieek lawng rawksak thai lai ben kah thaihu la awm. Aka sop on sop nawh thaihu khat on khat thuunkha ahih — rop hih nawh. Tedawngah he dilai Khrih thlangbol tim ah thintok thinsana, awlpungna, tawhsihna, pekbouna, ytehna on thaihu thee atlotlo thli awm popa ai. Aka sop bir Khrih thlangbol he lai ah awm thai nawh. Tedawngah Jesu lawng, “Cang ah thlan to tah pou haih mai hawn seh. Cang ah vengatah cang aka aatthli tengah Belthli te phuk lamha u langtah hai dawngah phuum hamla atheencala tum u, cang tetah ka thaidi khuiah van sang uh, ka tina badai, atina” (Matt 13:30).

Lai hing miphyn congna tah cang on pou haih la aka awm belthli angla ni awm. Cang ham raina petu la awm. Tede pou haih seh, Jesu lawng ati. Baibul Awltak hetah belthli tim kah cang angla awm — na raal te lungna ham ango. Raal pateng khaw Pathen lawng hawna thai. Miphyn singzo on hing khawsakna khaw a ngona zawn awm. Miphyn congna on Pathen awltak pawmsang thai tare la awm. Tedawng kalawng Matu church, Chin church, Burmese church and American church tila ana awm hang. Matu on Matu, Chin on Chin, Burmese on Burmese, American on American tah miphyn congna dawngah nok u the tangte la awm; pha u the tangte la awm; pawlneng haih tangte la awm; sa nep tangte la awm. Hetila “tangte” la awmna te Pathen ram ham seh. Tede Khrih singzo on thlanghing kah singzo tah hak hih popa ai (Ishmael on Isak; Esau on Jacob).